Omako Basoa Arte eta Natura deritzon arte-joeraren barruko obra bat da, eta Kortezubin dago, Urdaibaiko Biosfera Erreserban. Esku-hartze artistiko horretan, Agustín Ibarrola artistak ikusizko iradokizun, kontzeptu eta jokoak planteatzen ditu, baso bateko zuhaitzen enborrak margotuz, naturaren adierazpen gisa. 

Bizkaiko Foru Aldundiak bultzatuta, berriki Omako Basoa obra kokaleku berri batera eraman da, eta oraingo basoak zehatzago islatzen du artistaren jatorrizko ideia, galdu ziren multzo artistiko batzuk zabaldu eta berreskuratu baitira.

Neurri eta ezaugarrietan hainbat multzo artistiko osatzeko, hala nola Begiak, Koloredun zirkuluak, Erritmo inguratzaileak eta Basoko animaliak, zuhaitz gehiago margotu dira. Gainera, galdu ziren beste lau multzo berreskuratu dira: Kordobako meskita, Haritzari omenaldia, Mehatxu nuklearra eta Diagonal bidimentsionala. Horri esker, Omako Basoa obra oso-osorik goza dezakegu orain.